i85hngn55322016-02-01

黑煙鬼

泉州觸喙鼓

婆：我苦啊，僥倖啊！汝一眠燒 仔光，一燒就黃酸，毋去替儂死，逐日咧燒烏米，變弄仔三頓咧無米煮。害我餓仔半小死。夭壽啊，汝鴉片若毋改，原在佫即個死儂體，將來汝會家反悔哦！唉啊，阮實在是歹風水，無彩我生成甲拙媠，父母替我選仔甲目睭大母蕊，結果選著汝塊鴉片鬼。

公：唉啊，汝都毋免據據疼，好歹姻緣是天註定，嫁著我是汝的八字命，都毋是恁祖公咧無靈聖！汝何必著來怨身共戚命啊？

婆：我苦啊，儂嫁翁是傍翁食，傍翁穿，傍翁咧相致蔭，成翁成某相尊敬，啊汝一日燒仔骹蹺蹺，親象老猴咧歕洞簫，害我三頓著兩頓枵，若說起來我一腹氣是無地消哦。

公：誒誒誒，啊汝真正懵懂，話計亂子講，我雖然是咧歕竹管，變龜變鱉也著做衫度汝（幪），三頓番薯豆豉度汝咧爽。我雖然燒仔甲骹蹺蹺，猶未捌一日度汝枵！我雖然是（殘）甲漉漉漉啊，猶有番大麥度汝咧享福，我食穿若無法，生活若有解決，汝就是變面，嘛無我法！

婆：我苦啊我苦啊，我實在是真命苦，則會嫁著汝做某，終日大麥糊咧坉腹肚。唉啊，我當初時嫁汝的時陣，汝是甲肥肥傫傫，好看兼古錐，趁食照條規，哪會知汝佮歹儂做一堆，變弄仔著燒佫著（揻）。 而 仔胸前成樓梯，而且欠債欠仔一大堆，汝的目睭計褫毋開，薫鬼佫假英威哦。

公：唉，儂說得著，翁某翁某啊，相佮快活相佮艱苦，我雖然是土土，牢兩（缽）薰咧度汝惱，講我袂榮宗顯祖，總是我猶有豆腐渣，度汝咧食補，飲糜花咧配菜脯，食仔三頓計漲肚。哼，我度汝佇咧做小姐，汝佫敢佮我起歹癖，一日仔，我就度汝餓仔腹肚迵巴脊哦。

婆：夭壽，窮鬼佫愛放話而亂子講。汝有錢是去歕竹管，無一絲度我咧舒爽，汝都毋免咧摮講空，一湫臭屎講仔甜佫芳。汝佫激甲講仔（龍花）成寶鏡，嫁著汝是永遠咧歹命哦。

公：哈哈哈……罔去罔去，嫁著我也是過得去，我做儂而古意，是汝佇咧爭名奪利，雖然牢薰較無志氣，外面猶佫好名譽。毋捌為著窮佮儂咧起扦刺。哼，也毋是我咧悾歁氣，嫁著我是汝好八字，汝猶著去觀音媽地，去燒香向後世。

婆：向啥乜後世啊？向汝即兩塊死儂骨倆，不時窮仔甲絀絀絀，度我終日咧鬱卒，夭壽，汝即下猶兩眼朝天，吐霧歕煙，變弄仔成邪片仙，無燒激流瀾，癮著屎水揭咧濺，一個身軀變弄仔親像含草幹

公：唉唉唉，老實無相騙，我雖然是牢鴉片，但是錢銀捷摮變，到仔現在我猶度汝目鏡手錶佫掛金鍊，汝看我佇咧籤魔啡，有時燒仔甲目睭甲微微，罔是我頭殼內咧拍（手龜），趁錢趁甲一大堆，度汝食甲肥傫傫，汝敢講話來相剋虧啊？

婆：夭壽啊，汝開喙計理路，其實亂子吐，儂出門是坐（Alto），我出門著行路，我出門逐擺無半銑，害我變雞眼，雙骹咧步輦，儂慣食是山珍海味，慣啉是威仕忌，慣看是看影戲，我只有食飲糜配豆豉，夭壽啊，像汝種個拙無志氣，度我那想是那氣哦！

公：唉啊，汝都袂曉半項。坐（Alto）挵著有危險啊，行路而甲好消閃，若是山珍海味，常食就無味，哪會值得咱食番薯佫配豆豉啊？！ 啉威仕忌有火？質，常啉毋是穡。哪會值得咱啉水較有補質啊！影戲看了會頭殼眩，毋值咱厝內倒咧眠，目睭瞌咧養精神，汝逐擺苦甲面憂憂，有錢儂是毋值得咱一支骹手哦！

婆：我苦啊，儂是舒爽咧食用，好食佫好穿，心內誠高興，汝而無啥乜通相致蔭，逐日親象著大症，倒咧燒甲骹手揭咧躘，知的講汝是咧燒烏薰，毋知的以為是汝卜死咧虯筋。

公：誒誒誒，臭查某，汝毋通咧毋誠體，開喙咧亂子詈，若詈死我汝會大反悔，啊汝敢毋知叫，我鴉片若燒夠額，則會想趁食，（靈仔甲生擒共活掠，我是照古例，食薰是應世），博繳是討債，我無親象汝，喙仔咧咧，過厝過宅，是愛博仔甲卜（絕）（聽無。。。）

婆：哇哇，夭壽，汝哪大變款，肚裡計無溫暖，我博繳也著度汝管？若無我四色十和揭一起，二十支紙牌揭咧比，贏淡薄來買柴米，汝就著餓仔半小死哦！我苦啊，我命哪拙歹啊，無錢舀尿厚渣滓，若說得著我就著流目屎啊……

公：好 好囉好囉好囉，暗某啊，儂說得著，翁某是老公婆，床頭歹著床尾和，（儂團團）甲挐翱翱，則袂度厝邊目睭咧看無！汝（現成）？汝毋通再佫詈，食鴉片誠毋成體，一時我已經知反悔，從今以後我則漸漸改，汝毋通吼仔甲直直啜，乎？

婆：好倆！汝若會改變，家庭幸福就實現，汝也袂做佫歕竹管，將來咱就會快樂大舒爽。

公：著倆！聽某喙無敗害，逆某喙會絕三代。咱毋通佫分派，從今仔起著相親相愛，我著趁來奉承汝即個好太太，啊汝著小心照顧我即個好翁婿！

婆：當然的佫，從今仔日起，我莫按佫博牌仔，汝莫按佫燒烏薰，咱親愛夫妻百代恩，將來會討囝孫，百年偕老笑吻吻。

公：有影有影，哈哈，別日仔啊，咱公攍婆相佮牽孫去佚佗哦！